Ногоон технологи үйлдвэрлэгчдийг ирээдүйтэй аж ахуйн нэгж, орон сууцны эзэдтэй холбох

Европын сэргээн босголт, хөгжлийн банкнаас (ЕСБХБ) боловсруулсан энэ онлайн платформ хөрөнгө оруулалтын шийдвэр гаргах үйл явцыг оновчтой болгох замаар ногоон технологийг нэвтрүүлэх ажлыг хурдасгахад тусалдаг.

Тус платформ ирээдүйн худалдан авагчдыг тухайн улсад хамтран ажилладаг санхүүгийн байгууллагуудаар дамжуулан ЕСБХБ-ны санхүүжүүлэх хөтөлбөрүүдэд хамрагдахыг урьдчилан зөвшөөрсөн ногоон технологийн борлуулагчидтай холбодог.

Ногоон технологи аж ахуйн нэгж, орон сууцны эздийн хувьд илүү тогтвортой төлөв байдлыг бүрдүүлдэг санхүүгийн болон байгаль орчны үр өгөөж өгдөг.

• Технологийн худалдан авагчид худалдан авах зөв шийдвэр гаргаж, зээл авах боломжоо нэмэгдүүлэх боломжтой.
• Технологи үйлдвэрлэгчид хөрөнгө оруулалт хийхэд бэлэн байгаа боломжит худалдан авагчдын дунд бүтээгдэхүүнээ улам сайн сурталчилж танилцуулах боломжтой.
• Санхүүгийн байгууллагууд эрчим хүч, уур амьсгалтай холбоотой хүчин зүйлсэд илүү тэсвэртэй болоход нь үйлчлүүлэгчдэд тусалж болно.

Green Technology Selector платформ одоогоор ойролцоогоор 2,600 үйлдвэрлэгчийн 39,000 технологийг сурталчилж, жил бүр 15,000 орчим технологи худалдан авахад тусалж байна.

Худалдан авагч хамтран ажилладаг санхүүгийн байгууллагуудын санхүүжүүлэхийг хүсэж буй ногоон технологи нийлүүлэгчдийг олох боломжтой.

Борлуулагч технологио үнэ төлбөргүй бүртгүүлж, зээл авах боломж нь аль хэдийн бүрдсэн, хөрөнгө оруулахад бэлэн буй худалдан авагч нар байгаа зах зээлд нэвтрэх боломжтой.

Санхүүгийн байгууллагууд ЕСБХБ-ны санхүүжилтийн хөтөлбөрт аль хэдийн хамрагдах боломжтой технологийг зааж өгөх замаар гүйлгээний зардлыг бууруулж чадна.

“Ногоон” технологийг хэрхэн тодорхойлох вэ?

Green Technology Selector платформ ЕСБХБ-ны зарчим, бодлого журам, үйл ажиллагаанд нийцсэн технологийг сурталчилдаг. Үүнд Банкны шударга байдлын стандарт, байгаль орчин, нийгмийн бодлого, ногоон эдийн засагт шилжихэд зориулсан арга зүйн заавар багтана.

• Эдгээр технологи зах зээлийн нийтлэг практиктай харьцуулахад уур амьсгалын өөрчлөлтийг бууруулж, дасан зохицох боломж олгож эсвэл байгаль орчинд бусад ашиг тус хүргэдэг.
• Зах зээлийн гүйцэтгэл, хууль тогтоомжид нийцэх төлөв байдлыг тогтмол хянаж үзээд технологийн ангилал тус бүрд гүйцэтгэлийн хамгийн бага шалгуурыг тогтоодог.
• Борлуулагчид технологийн бүтээгдэхүүн бүрийн хувьд хамгийн сүүлийн үеийн дэлгэрэнгүй мэдээлэл өгч, технологийнхоо шинж байдлыг бүртгүүлэх шаардлагатай ба манай техникийн мэргэжилтнүүд шалгуур хангах эсэхийг шалгаж дүгнэнэ.
• Эдгээр шалгуурыг хангаагүй технологийн бүтээгдэхүүнийг хасдаг.

Их хүчин чадалтай ногоон технологи гэж юуг хэлдэг вэ?

Их хүчин чадалтай ногоон технологи гэж тухайн сонгосон улсын хувьд ЕСБХБ-наас тогтоосон Гүйцэтгэлийн шалгуурыг хангаж байгаа гэсэн үг юм. Гүйцэтгэлийн шалгуурыг технологийн ангилал, улс бүрээр тодорхойлдог. Үүнд технологийн өртөг, зах зээлийн төлөвшил зэрэг тухайн улсын зах зээлийн хөгжлийг тусгасан ердийн орлуулах технологийн үндсэн үзүүлэлтээс доод тал нь 20% хувиар гүйцэтгэлийг сайжруулахыг шаарддаг бөгөөд улмаар зөвхөн тухайн улсын зах зээлд байгаа их хүчин чадалтай технологийн сегментийг дэмждэг.

Green Technology Selector платформыг Австрийн Холбооны Сангийн яам санхүүжүүлж боловсруулсан.